Perezida wa Repubulika Iharanira Demokarasi ya Congo, Félix Tshisekedi, yihanganishije imiryango y’abaturage 35 bishwe kuri iki cyumweru, tariki 8 Gicurasi, mu gitero cyagabwe n’umutwe witwaje intwaro wa Codeco.
Ni ubutumwa Perezida Tshisekedi yatanze yifashishije Twitter, aho ari mu ruzinduko muri Sénégal.
Yihanganishije imiryango yagize ibyago, “anashimangira ubushake bwo kurandura iyi mitwe yitwaje intwaro iri ku butaka bwa Congo.”
Ni imibare ariko iri munsi y’abantu barenga 60 byari byatangajwe ko bishwe muri ako gace ka Djugu mu Ntara ya Ituri.
Umuyobozi wa Segiteri Banyali-Kilo, Innocent Matukadala, yatangarije Radio Okapi kuri iki Cyumweru ko aba barwanyi bagabye igitero bitwaje imbunda n’imihoro, binjira muri ako gace gakungahaye ku mabuye y’agaciro barasa buri muntu wese bagezeho.
Benshi mu bishwe bari abacukuzi b’amabuye y’agaciro babikora mu buryo gakondo. Bamwe bari baryamye baruhuka. Ni ubwicanyi bwatangiye ahagana saa Kumi zo mu rukerera.
Aba barwanyi bahise banatwika inzu zitandukanye zari hafi aho, ku buryo uretse abaturage barashwe, abandi bishwe n’umuriro.
MONUSCO yijeje ubufasha mu guhungisha abaturage bakomeretse. Hari amakuru ko abagera kuri 36 bashyizwe mu bitaro ku Cyumweru.
ubwanditsi@umuringanews.com
